Mwaka tunaouangazia ulikuwa kipindi cha wakati mgumu sana kwa shughuli zetu Kenya na Ethiopia. Viwango vya juu vya riba na mfumko wa bei vilizalisha mazingira magumu sana mwaka huo, hata licha ya ukuaji mzuri wa GDP wa 5.6% mwaka 2023 nchini Kenya.

Kudorora kwa thamani ya sarafu pamoja na kukazwa kwa sera ya kifedha nchini Kenya, na kudhibitiwa kwa sarafu nchini Ethiopia vilizidisha makali ya changamoto hizo, na kuathiri bei ya kawi. Hili nalo lilizidisha shinikizo za mfumko wa bei na kupunguza kiasi cha fedha za matumizi ya hiari miongoni mwa watu.

Ni muhimu kueleza kuwa haya yote yalikuwa yakitokea katika mazingira ya uchumi wa dunia ambao ulikuwa bado wenye misukosuko, ambapo vita na athari zake kwenye biashara, uchukuzi na kawi viliendelea kuongeza shinikizo kote duniani na hasa katika mataifa yanayoendelea kiuchumi.

Kwa maelezo zadi kuhusu mazingira yetu ya uendeshaji shughuli, Bonyeza hapa.

Changamoto nyingine ilitoka upande wa kisheria, ambapo tulishuhudia kuongezwa kwa viwango vya kodi ya bidhaa katika miamala ya kutuma pesa kwa njia ya simu na pia kodi ya ziada kwenye laini za simu. Tunaendelea kufuatilia kwa karibu yanayotokea, ukizingatia kwamba kuongezwa kwa kodi kunaweza kuathiri biashara yetu na shughuli zetu.

Baada ya Bodi kuidhinisha mkakati wetu wa 2030, lengo letu sasa ni kuwa kampuni ya kiteknolojia inayoongozwa na malengo inayoongoza Afrika. Kwa kuongozwa na ruwaza hii, tunalenga kutumia kikamilifu fursa ambazo tumezitambua.

Miongozi mwa fursa hizi ni kasi ya kibiashara ambayo tunaitarajia nchini Ethiopia kuanzia kipindi kifupi hadi cha wastani. Hii ni pamoja na ongezeko la idadi ya watu wanaotumia mtandao wetu, fursa za kufaidi kifedha kama vile data kwenye simu – ambayo tumeshuhudia ongezeko kubwa katika utumiaji wake – kuongezeka kwa wanaotumia M-PESA, na kusambazwa zaidi kwa huduma zetu kote nchini humo kutokana na kuwepo mazingira yenye usalama. Tunatambua na kuthamini sana usaidizi na ushirikiano wa serikali ya Ethiopia tunapofanya kazi kwa pamoja kuisaidia kutimiza azma yake ya kujenga Ethiopia ya Dijitali.

Ethiopia ni ya pili kwa idadi ya watu barani, na wengi ni vijana. Hata hivyo, matumizi ya simu ni 50% pekee, jambo linaloashiria uwezo mkubwa wa soko hilo. Tuliufunga mwaka huo tukiwa na vituo 2,800 vya mitambo ya kutoa huduma za mawasiliano na tunatarajia kwamba tutakuwa tumeongeza maeneo 3,500 kwenye mtandao wetu kufikia mwisho wa mwaka wa kifedha wa 2025. Hili litawezesha kutimizwa kwa lengo letu la kuwa mstari wa mbele katika ukumbatiaji wa dijitali na ujumuishaji wa wengi katika mifumo ya kifedha katika soko hilo.

Ukizingatia kwamba biashara yetu ya huduma za mtandao Kenya tayari imekomaa, tunaiona fursa katika huduma za kifedha kwa njia ya simu, jambo litakalotuwezesha kufikishia wengi huduma za kifedha na kuhakikisha watu wengi wanajumuishwa katika mifumo ya kifedha. Tunaiendeleza M-PESA ili kuifanya kuwa jukwaa linalotoa huduma za usimamizi wa mali, na huduma mbalimbali za mikopo na uwekaji akiba.

Tunafanya kazi pamoja na serikali kusaidia kufanywa dijitali kwa huduma za serikali na kurahisisha utoaji huduma kwa raia. Kwa pamoja na wadau wengine katika sekta hii na kwa usaidizi wa Serikali ya Kenya, tulizindua kiwanda cha kipekee cha kufunganisha mitambo Kenya ambacho kitazalisha simu za kisasa na mitambo mingine, na kuifanya kuwa rahisi kutimiza ajenda ya Serikali ya uchumi wa dijitali.

Kwa maelezo zaidi kuhusu mkakati wetu, Bonyeza hapa.

Tumekuwa tukihudumu Ethiopia kwa takriban miezi 18, na najivunia sana hatua ambazo tumezipiga nchini humo. Lengo letu limekuwa kupanua shughuli zetu ili kujiweka katika nafasi muhimu kwenye sekta ya mawasiliano ya simu nchini humo kama tunavyotazamia.

Kwa sasa, tumefikia 40% ya wananchi nchini humo na tumeongeza wateja wetu hadi zaidi ya 9.4 milioni tangu kuanza shughuli zetu. Lengo letu la kutekeleza mchango muhimu katika kuifanya Ethiopia kuwa ya kidijitali bado lipo, kupitia miundo mbinu na matumizi, mambo yanayodhihirisha kwamba tupo katika nafasi nzuri ya ukuaji nchini humo.

Ni fahari yangu kukariri kuwa kujitolea kwa Safaricom kwa watu katika maeneo tunayohudumu, na kwa mazingira kote tunakoishi, kulisalia imara katika mwaka tunaouangazia. Katika kipindi cha mwaka mmoja, taifa lilitoka kwa kiangazi na kuingia kwenye mafuriko, jambo ambalo lenyewe ni ushahidi wa athari za mabadiliko ya tabia nchi. Ni heshima yangu kuweza kuongoza uwakilishi wa sekta ya kibinafsi katika Mfuko wa Msaada wa Kukabiliana na Janga la Taifa, na kusaidia juhudi za serikali.

Nyakfu zetu mbili ziliendeleza kazi yake muhimu katika kutatua changamoto za kiafya, kielimu na kifedha na ujumuishaji. Usaidizi na uvumbuzi ambao nyakfu hizo hutoa vinasalia kuwa sehemu muhimu ya jukumu letu kama shirika raia wa kuwajibika.

Isitoshe, udhamini wetu wa shindano la kandanda la Chapa Dimba mwaka huu uliwawezesha maelfu ya vijana kutoka timu 3,300 kote nchini, kutimiza ndoto yao kuhusu mchezo huo. Inaridhisha sana kuwaona wakikutana na kujumuika kupitia michezo na muziki na kuendeleza vipaji vyao.

Kwa maelezo zaidi kuhusu nyakfu zetu, CSI na mazingira, Bonyeza hapa na Bonyeza hapa mtawalia.

Ninaamini kwamba tupo kwenye nafasi nzuri ya kuendelea kwenye mkondo wetu wa ukuaji thabiti katika kipindi kifupi, cha wastani na kirefu. Katika kipindi cha wastani, ninatarajia kwamba tutaanza kutengeneza faida nchini Ethiopia kufikia mwisho wa mwaka wa nne wetu kuwa na shughuli zetu humo.

Nchini Kenya, kwa azma yetu ya kubadilisha maisha, sasa tunatekeleza ruwaza na mkakati mpya. Tutaendelea kushuhudia ukuaji, tunapojizatiti kuwa kampuni ya kiteknolojia inayoongoza Afrika kufikia 2030.

Ninaamini kwamba kwa njia zetu za wepesi wa kufanya kazi na kuchukua hatua, utamaduni wetu wa kuangazia mteja katika kila kitu na kuwa na manufaa kwa jamii, tunao msukumo, nguvu na vifaa vya kuimarisha zaidi ukuaji ambao tumeupata mwaka huo.

Ninaishukuru sana Bodi yetu mpya kwa jinsi walivyoniunga mkono kwa kujitolea, bidii na umakinifu na bila shaka kundi lote la wasimamizi. Uongozi wao wa hekima umetupatia msingi imara ambao umetuwezesha kufanikisha matokeo ya kuridhisha ambayo tumeyaona.

Ningependa pia kushukuru mamlaka simamizi za sekta yetu nchini Kenya na Ethiopia, ambazo uungaji mkono wake ni muhimu sana katika jinsi tunavyoendesha shughuli zetu. Wauzaji wa bidhaa na huduma zetu na maajenti katika mataifa hayo mawili, pia, wameendelea kuchangia pakubwa katika ufanisi wetu. Ningependa kuwashukuru kwa uaminifu wao na kwa kujitolea kukuza nembo yetu.

Kwa wenzangu kote katika biashara yetu – ninajivunia sana kujitolea kwenu, vipaji na kwa kufuata mtindo wetu wa ufanyaji kazi, kuangazia mteja katika kila jambo na kujitolea kwetu kubadilisha maisha. Ni juhudi zetu ambazo zimetuwezesha kufanikisha matokeo haya.

Ningependa kuwashukuru wenyehisa wetu wote, na washirika wetu wote pamoja na wadau ambao wameendelea kutuunga mkono, jambo ambalo ni muhimu sana kwa biashara yetu.

Mwisho kabisa, ningependa kuwashukuru wateja wetu kwa uaminifu wao katika mwaka ambao ninajua umekuwa mgumu sana kwa wateja wetu. Tunathamini sana imani yenu kwetu kuwapa huduma na bidhaa mnazozihitaji.

Peter Ndegwa
Afisa Mkuu Mtendaji